आपल्या वसतिगृहातील तसेच पुण्यातील ज्या ब्राह्मण विध्यार्थ्यांना अभ्यासासाठी जागा उपलब्ध नाही त्यांचेसाठी कै. सुमन दिगंबर  वाडेकर अभ्यासिका चालविली जाते.

संपूर्ण महाराष्ट्र व महाराष्ट्राशेजारील राज्यांमधील ब्राह्मण विद्यार्थ्यांना इयत्ता १२ वी नंतरच्या शिक्षणासाठी या दत्तक योजने अंतर्गत परतफेड शिष्यवृत्ती दिली जाते. विद्यार्थ्यांचे शिक्षण पूर्ण झाल्यानंतर त्याने त्यास मिळालेली शिष्यवृत्तीची रक्कम परत करावयाची असते यासाठी कोणत्याही  प्रकारचा व्याजाची आकारणी संस्थेकडून केली जात नाही.

सदर योजनेचा उद्देश हा आपल्या समाजातील व्यक्तीने देणगी स्वरूपात रक्कम देऊन त्यारकमेवरील मिळणाऱ्या व्याजातून एका विद्यार्थ्याच्या शिक्षणासाठी मदत करणे हा आहे. म्हणजेच थोडक्यात एखाद्या देणगीदाराने रु. १०,०००/- देणगी दिल्यास सदर रक्कम संस्थेतर्फे मुदत ठेवीत गुंतवली जाते. त्यावर साधारण प्रमाणे आजच्या व्याजाच्या द.सा.द.शे. ६% या दराने येणारे व्याज रु. ६००/- विद्यार्थ्यांला परतफेड  शिष्यवृत्ती स्वरूपात दिले जातात. या प्रकारे देण्यात येणाऱ्या शिष्यवृत्तीधारक विध्यार्थ्याला कोणत्या देणगीदाराच्या व्याजातून त्यास किती रक्कम दिली आहे हे दरवेळी कळविले जाते. तसेच ही सर्व माहिती संस्थेच्या ‘याज्ञवल्क्य परिवार‘ या मासिकात दिली जाते. सदर योजनेसाठी आतापर्यंत रु. ७३.९६ लाख रुपयाच्या  देणग्या संस्थेस प्राप्त झाल्या आहेत. शिक्षणानंतर विद्यार्थ्यांनी परत केलेली रक्कम परत अन्य विद्यार्थ्यांना  दिली जाते. सन २०२१-२२ वर्षात संपूर्ण महाराष्ट्र व त्या बाहेरील विद्यार्थ्यांना एकूण रु. —————-/- शिष्यवृत्ती रूपाने देण्यात आली आहे.

ब्राह्मण विद्यार्थ्यांना चांगले गुण मिळाल्यावर त्यांचे आपल्याच समाजाकडून कौतुक व्हावे या उद्देशाने १० वी., १२ वी व त्यानंतरच्या विद्यार्थ्यांना जिल्हानिहाय केलेल्या अर्जदार विद्यार्थ्यातून पहिल्या तीन विद्यार्थ्यांना प्रत्येकी पहिले रु. १५००, दुसरे रु.१००० व  उत्तेजनार्थ रु.५०० अशी पारितोषिके  सन २०२१-२२ मध्ये दिलेली आहेत. सदर योजनेसाठी  आतापर्यंत रु. ६.०० लाख रुपयांची देणगी प्राप्त झाली असून त्याच्या व्याजातून ही पारितोषिके दिली जातात.

पुरातन  काळापासून आपल्या वेदांचा अभ्यास करून त्याचे संवर्धन ब्राह्मण समाज करीत आला आहे.  त्यास प्रोत्साहन देण्याचे उद्देशाने वेदविद्या संवर्धनासाठी झटणाऱ्या ब्राह्मण संस्थाना या उपक्रमाद्वारे मदत केली जाते. यात प्रामुख्याने पारंगत, मान्यवर वेदमूर्तीचा सत्कार, वैदिक शिक्षण घेणाऱ्या विद्यार्थ्यास त्याच्या शैक्षणिक कार्यकाळासाठी अनुदान देणे, वेदाभ्यासीना प्रोत्साहनपर पारितोषिक देणे, तसेच पुरातन ग्रंथांचे, पोथ्यांचे संगोपन व पुनर्मुद्रण करण्यासाठी सहाय्य करणे, वेदविषयक व्याख्यानांचे आयोजन करणे,  वेदांच्या भाषांतरासाठी साहाय्य करणे इत्यादींचा समावेश होतो

या उपक्रमाअंतर्गत वेदाचार्य पुरस्कार, घनपाठी पुरस्कार, वैदिक अध्यापक पुरस्कार, आदर्श वैदिक  पाठशाळा पुरस्कार, यजुर्वेद संहिता मुखोद्गत करणाऱ्या वैदिक छात्रांसाठी छात्र पुरस्कार असे विविध पुरस्कार दिले जातात. यासाठी स्वतंत्र समिती गठीत केली आहे. त्या समितीत या क्षेत्रातील मान्यवर व्यक्तींचा समावेश केलेला आहे.

या उपक्रमासाठी आतापर्यन्त रु. ६.२० लाख रुपयांच्या देणग्या प्राप्त झाल्या असून त्यावरील  व्याजाचा विनियोग वरील पुरस्कारासाठी केला जातो.

समाजातील मान्यवरांना त्यांच्या नातलगांच्या प्रित्यर्थ अन्नदानासाठी काही रक्कम द्यावयाची  असते. त्या उद्देशाने  संस्थेने हा उपक्रम चालू केलेला आहे. या उपक्रमाअंतर्गत प्राप्त झालेल्या देणगीवरील व्याजातून विविध वेदपाठशाळाना छात्र भोजन साठी मदत केली जाते. आतापर्यंत या उपक्रमासाठी संस्थेस एकूण रु. ३.६७ लाख देणगी प्राप्त झाली आहे.

परगावहून अल्प कालावधीसाठी पुण्यात येणाऱ्या सामाजीतील व्यक्तीसाठी संस्थेच्या वास्तुत कै.सिंधुताई त्रिंबक केंघे अतिथी गृह अत्यंत अल्प दारात उपलब्ध करून देण्यात आले आहे.